Harpreet Ki Kalam Se

Cometia hi Cometia

Cometia hi Cometia :
Badlav, ek chota sa shabad, ek sukhad ehsas, prakrati ka niyam aur waqt ki maang, yahi sab chipa hai is chote se shabad badlav me. In 60 saalo ke baad hamare desh ko ab cometio ka desh kaha jaye to galat nahi hoga. in 60 saalo me kai sarkare aai aur kai gai, lekin ek baat ki smanata to sab me rahi aur vo hai cometio ko banane ki
Koi bhi kaam ho ya kuch bhi ho jaye jaise kisi ko cheenk ane se lekar kisi ka khoon ho jane tak, kisi kanya ko chedne se lakar kisi ke balatkaar tak, kisi ki jeb katne se lekar bank lootne tak, kisi chote chor ke chori karne se lakar kisi bade mantri ke ghotale tak, foran ek cometi bitha di jati hai, yeh jaan ne ke liye ki usne aisa kyun kiya. koi chunav haar jaye to ek cometi bitha do ki kyun hara, koi jeet jaye to cometi bitha do ki kaise jeeta, agar kabhi kisi neta ki gaadi ke neechey koi kuta bhi aa kar mar jaye to bhi ek cometi bitha di jayegi yeh jaanchne ke liye ki vo kuta kiska tha, aur neta ji ki gaadi ke neechey aya kaise, aur shayad fir ek cometi bitha di jaye jo sirf yeh pata lagaye ki us kute ka gaadi k neechey aa jana mahaj ek itefaq tha ya kisi aur ki sazish.
Aur to aur yahan to janam ko lekar bhi cometi bitha di jati hai.
agar koi mahila kisi shishu ko janam de to bhi ek cometi bitha di gaygi jo yeh pata lagayegi ki is janam ke peechey kis kis ka hath hai, aur agar kisi mantri ka hath hua to fir ek cometi bana di jayegi jo yeh pata lagayegi ki pichli cometi ne apni jaanch sahi dhang se ki ya nahi ?
Lekin ha ek cometi hai jo nirdharit samay par apni report de deti hai aur vo hai hamare desh ke jagrook ? netao ki masik aaye me kitni vradhi ki jaye aur kitni jaldi us report par amal kiya jaye.
Aaj apne is maulik adhikar ka prayog karte hue, me is azad Bharat ka, dunia ke itne bade loktantra ka nagrik hone ke naatey ye maang karta hu ki ek cometi aisi banai jaye jo yeh pata lagaye ki aaj tak kitni cometia bani, unke kya natije nikle, un cometio ne kya kya faisle diye aur unme se kitne faislo par amal hua ? Aur agar amal nahi hua to kyun nahi hua ? Iska pata lagane ke liye bhi fir ek cometi bithai jaye.
Kher apne dimag ke ghode daudatey hue jab me kafi dur tak nikal gaya, achanak mera dimag fisal gaya yeh soch kar ki kya pata kal fir koi cometi bitha di jaye ye pata lagane ke liye ki "Satish" ne jo swal apne lekh me uthaye hai unke liye usey kisne uksaya, aur uksane ke peechey
kahin videshi takto ka hath to nahi, umeed hai yeh cometi jald hi apni jaanch puri kar ke apni report de degi.
Jay ho cometi banane walo ki, jay ho un cometio ko jhelne walo ki, aur ant me jay ho un cometio ke faislo ka intzar karne walo ki. Bhagwan sabka bhala kare, Mera Bharat Mahan.......